CROESO I WEFAN CAPEL Y NANT

SULIAU  MEHEFIN

Oedfaon yn y Capel a thros Zoom:

5 Mehefin :      

Oedfa Gymun am 10.30 yng ngofal Robat , yna oedfa gydenwadol y  Sulgwyn y m Mharc Waverley  am 3 .00 o dan arweiniad  y Parchedig Leslie Noon.

12 Mehefin :    

Cwrdd Cyfoes am 9.30 yna  oedfa 'r bore am  10.30 yng ngofal y  Chwaeroliaeth ar thema ' Myfi sy ’ n gwybod fy mwriadau a drefnaf ar eich cyfer ' (Jeremeia 29:10- 14)

19 Mehefin :   

Pererindod  –  manylion i ddilyn

26 Mehefin :   

C wrdd Cyfoes am 10.30  gydag  oedfa ’ r hwyr am 5 .00 o dan arweiniad Mr  Eifion Walters

Cofiwch hefyd am gwrdd gweddi a myfyrdod y Gannwyll pob nos Fawrth am 6.30 dros Zoom

Sioe Ffasiwn O Law i law

Wedi  dwy  flynedd o orfod cyfyngu ar weithgareddau cymdeithasol oherwydd COVID-19, roedd yn braf iawn gallu mentro cynnal digwyddiad cymdeithasol i godi arian yn ystod wythnos Cymorth Cristnogol eleni. Efallai ein bod ni ’ n fwy ymwybodol nag erioed yn 2022 o ’ r angen mawr sydd am waith Cymorth Cristnogol mewn cynifer o rannau o ’ r byd, ac mae cyfiawnder hinsawdd a gwrthweithio ’ r difrod mae arferion gwastraffus gwledydd cyfoethog fel Prydain yn ei achosi yn elfen allweddol o ’ u gwaith ymgyrchu. Y syniad gafwyd, felly, oedd rhoi cynnig ar rywbeth newydd a chynnal sioe  ‘ ffasiwn gwyrdd ’  yn Neuadd y Nant. Mae siop elusen T ŷ  Croeso yn y pentref, O Law i Law, yn mynd o nerth i nerth, felly dewiswyd detholiad o ddillad o ’ r fan honno, a bodlonodd rhyw ddwsin o wirfoddolwyr i fodelu. Roedd yr amrywiaeth lliwgar o ddillad yn edrych yn ddeniadol dros ben, a bu Bill yn gweithredu fel  ‘ DJ ’ , gan drefnu bod cerddoriaeth hwyliog yn gyfeiliant i bawb gamu i ’ r canol a dangos eu gwisgoedd. Diolch o galon i bawb fu ’ n helpu ar y noson  – roedd yn wych cael cyfle i ddod at ein gilydd yn gymdeithasol eto, ac fe godwyd swm teilwng iawn o ryw £500 i Gymorth Cristnogol.  Diolch i Fiona am y trefniadau ac, wrth gwrs, i'r modelau gosgeiddig!

Dosbarthwyd y Datganiad isod ar ran aelodau Capel y Nant gan ein Pwyllgor Gwaith. Mae'n galw ar wleidyddion i sicrhau llwyddiant Cynhadledd tyngedfennol o bwysig Newid Hinsawdd COP26 sydd i'w chynnal yn fuan yn Glasgow. Danfonwyd at y Prif Weinidog Boris Johnson a Llywydd y Gynhadledd, Alok Sharma AS yn benodol ac at a nifer o aelodau Senedd San Steffan a Senedd Cymru:

'Gan nodi rhybudd gwyddonwyr y Cenhedloedd Unedig (6ed Adroddiad yr IPCC, 9 Awst, 2021) bod Newid Hinsawdd yn peryglu dyfodol dynoliaeth, mae Pwyllgor Gwaith eglwys Capel y Nant, Clydach, Abertawe SA6 5HB yn galw ar Lywodraeth y Deyrnas Gyfunol i geisio ymhob ffordd i sicrhau cytundeb cryf  yng Nghynhadledd Hinsawdd COP26 yn Glasgow. 

'Gyda’r nôd o ffrwyno Cynhesu Byd-eang trwy dorri allyriadau carbon, credwn ei bod yn hanfodol bod Llywodraeth y Deyrnas Gyfunol - fel Llywydd y Gynhadledd -  yn arwain cyn dechrau’r trafodaethau gan wrthod y ceisiadau cyfredol i agor maes olew newydd ym Môr y Gogledd a phwll glo newydd yng ngogledd Lloegr.'

AT: Y Gwir Anrhydeddus Rishi Sunak AS, Canghellor y Trysorlys, Ty'r Cyffredin, San Steffan, Llundain SW1A 0AA        Rhagfyr 4, 2020

Annwyl Ganghellor Sunak,

MEDDYLIWCH ETO AM DORIADAU CYMORTH OS GWELWCH YN DDA

Yr ydym ni, aelodau o Bwyllgor Gwaith eglwys Gymraeg Annibynnol Capel y Nant  yng Nghlydach, Abertawe SA6 5HB yn dymuno mynegi ein siom ddirfawr gyda’ch cyhoeddiad bod Llywodraeth San Steffan yn bwriadu torri’r ganran o GDP y Deyrnas Gyfunol a roddir at gymorth rhyngwladol o 0.7% i 0.5%.

Pwyswn arnoch i feddwl eto fel Canghellor ynglŷn â’r bwriad hwn.

*** Am y Datganiad llawn, ewch at 'Ffydd ac Ymgyrchu'

Mae Capel y Nant yn eglwys sy'n ddiwyd wrth gefnogi achosion da, gan ddewis un lleol ac un rhyngwladol bob blwyddyn dan arweiniad ein Grwp Eglwys a Chymdeithas.

Rydym wedi colli llawer o gyfleoedd oherwydd cyfyngiadau Covid-19 i godi arian at ddwy elusen 2020-2021, sef Ambiwlans Awyr Cymru a Chapel y Nant ei hun. Yn wyneb hynny, rydym wedi creu Apel arbennig er mwyn i aelodau gyfrannu arian at yr achosion hyn.